Որոշ մասնագետներ կարծում են, որ վաճառքի ծավալները մեծացնելու համար միակ ճանապարհը նոր հաճախորդներ գտնելն է, որոշներն էլ ասում են, որ այս ռազմավարությունը աստիճանաբար դադարում է նոր վաճառքների ապահովման պոտենցիալ աղբյուր լինել: Շատ ավելի հեշտ է գոյություն ունեցող հաճախորդին օգնել` գնի ձեզանից, քան նոր հաճախորդին համոզել: Օսթերյունգը թերևս դիպուկ է նկարագրել առկա հաճախորդներին համեմատելով լավ հասած ու խորը կախված խաղողի վազի հետ: Կարևոր է պահպանել համագործակցությունը արդեն իսկ առկա հաճախորդների բազայի հետ, քանի որ նրանք արդեն վստահում են ձեզ:
Նախքան նոր հաճախորդներ գտնելը և վաճառքի ծավալները մեծացնելը, պետք է հասկանալ, թե ով է ձեր հաճախորդը, ինչ արժեքի ապրանք կամ ծառայություն եք առաջարկում նրան, ինչ մրցակցային պայմաններում եք գտնվում շուկայում և ինչ բացեր կան ձեր բիզնեսում: Այլ կերպ ասած, հարկավոր է որոշակի շուկայական հետազոտություններ անել: Շուկայական հետազոտությունները տարբեր են` պարզ որակական հետազոտություններից մինչև խորքային քանակական վերլուծություն: Դա հնարավոր է անել շատ արագ և էժան` հարցումներ ուղարկելով ձեր առկա հաճախորդներին` օգտագործելով առցանց հարցման գործիքները: Բայց կախված այն հարցերից, որոնց դուք փորձում եք պատասխանել և ձեր հետազոտության բյուջեից, ձեր շուկայի ուսումնասիրությունը կարող է ներառել հաճախորդների հետ ավելի ընդարձակ հարցազրույցներ և որակական ուսումնասիրություններ այն մասին, թե ինչ կարծիք ունեն հաճախորդները ձեր բիզնեսի, արտադրանքի և ծառայությունների վերաբերյալ: Նրանցից ստացած feedback-ը անչափ կարևոր է. դա կօգնի ոչ միայն վերոհիշյալ հարցերին պատասխանել, այլև հասկանալ վաճառքները ավելացնելու ձեր խնդիրների և հաճախորդների ունեցած խնդիրների միջև սահմանը: