Դուք ուզում եք հիանալի առաջին տպավորություն թողնել, իսկ ի՞նչ պետք է անել հանդիպմանը դրան հասնելու համար: «Ոսկե ժամ» արտահայտությունը հայտնի է բոլորիս և չափազանց կարևոր է մեր կյանքում:
Վաճառքի ոլորտում անչափ կարևոր է առաջին րոպեն, երբ պետք է մասնագետը ներկայանա հաճախորդին: Այդ «ոսկե րոպեում» վաճառքի մասնագետը պետք է կարողանա ներկայացնել իրեն, իր կազմակերպությունը, կենսափորձը և գրանցած հաջողությունները: Շատերը սա անվանում են «elevator speech»: Ինչպես որ վերելակներն են բարձրանում բարձրահարկ շենքերի ամենավերին հարկը շատ կարճ ժամանակում, այդպես էլ վաճառքի մասնագետը պետք է այնպես անի, որ իր հայտնած տեղեկությունը հաճախորդը ընկալի ամբողջությամբ և կարճ ժամանակում: Այդ մեկ րոպեից է կախված, թե հաճախորդը կցանկանա արդյոք գործ ունենալ տվյալ մասնագետի հետ, թե ոչ: Եթե այդ մեկ րոպեն հաղթահարում եք և կարողանում եք արագորեն վստահություն ձեռք բերել, ուրեմն համարեք` գործարքի կեսն արված է:
Ընդամենը 60 վրկյ.-ի ընթացքում հնարավոր է տալ առավելագույն ինֆորմացիա: Առաջին ութ վայրկյանի ընթացքում հարկավոր է բացատրել, թե ինչ է անում ձեր ընկերությունը և որն է նրա առաքելությունը: Այնուհետև պետք է ներկայացնել վերջերս ունեցած հաջողության որևէ պատմություն` փաստարկված, սեղմ և հետաքրքիր: Պատմությունը հարկավոր է ներկայացնել կոնկրետ թվերով. միայն այդպես է խոսքն ավելի ազդեցիկ դառնում: Դրան էլ եթե գումարվում է վաճառքի մասնագետի գրագետ առոգանությունն ու համոզիչ խոսելը, ապա դրական արդյունքն սպասեցնել չի տա: